RAIZ: Ban hasi nos cas limpi
Cu hopi interes nos a bin ta sigui e conflictonan interno cu tabata tumando lugar den partido POR y a mira con esaki a culmina diabierna ultimo den parlamento. Laganos no ban pretende cu e caso aki no tin nada di haber cu corupcion, manera pa nos sorpresa diferente parlamentario a purba hasi. E caso aki netamente tin tur cos di hasi cu corupcion y cu falta di integridad.
Nos ta aprecia minister Lopez-Tromp su esfuerzo pa logra ta presente den parlamento pa por a defende su mes y de paso sali na defensa di integridad. E mocion di desconfiansa tabata un smoke screen pasobra ningun parlamentario di POR a logra presenta un punto valido pa substancia e mocion di desconfiansa….nan no a ni purba.
Despues di a tende minister su banda di medaya nos ta aplaudi e forma con e la maneha tur e iregularidadnan cu ela bin encontra den e ministerio cu ela tuma over di ex minister Otmar. Entre nan iregularidadnan cu RAiZ a bin ta señala desde 2017. Esaki ta un momento historico. Pa prome biaha den nos 34 anja di Status Aparte un minister a para firme den pleno presencia di tur parlamentario contra casonan di corupcion cu ta tumando lugar den su ministerio cu tin di haber cu miembronan y “ex – miembronan” di su propio partido.
Esaki ta mustra cu SI ta posibel pa Aruba cuminsa “hasi su mesun cas limpi” y atende cu e casonan di nepotismo, patronahe politico y e falta di integridad y transparencia cu a corumpi nos aparato gubernamental y cu a costa nos pais miyones y miyones di florin cu na final a faborece un grupito chikito a costo di e bienestar general di nos ciudadanonan y cu awe ta pone cu un intervention di Hulanda ta casi inevitabel.
Si nos tur contribui y stop di tapa pa otro nos por logra crea e Aruba di cual nos tur por ta orguyoso atrobe. E Aruba unda nos no mester roga pa un favor politico pa hanja algo riba cual nos tin derecho e Aruba unda nos tur tin e mesun oportunidadnan sin tin di depende riba e clase politico pa “fix cos”.
Ta di lamenta cu despues di casi 3 aña den gobernacion ta conflicto politico a pone cu tur esaki a mira luz di dia y cu no ta un departamento di integridad a identifica y denuncia e bainanan aki.
Na 2017 RAiZ a propone pa eleva e tema di integridad na nivel di minister caminda un minister di integridad por monitor su coleganan y hasi exactamente loke minister Lopez-Tromp a wordo forsa di hasi diabierna ultimo. E falta di integridad cerca e chikitonan ta facil pa controla pero e abusonan grandi mester wordo controla na nivel di minister.
Minister Lopez-Tromp a laga un paar di bom cai y ainda e tin mas informacion pa comparti. Nos ta spera cu e mediacion cu mester tuma luga no tin como consequencia cu lo tapa resto di e bainanan cu ta andando den e departamentonan cu ta cai bou di e minister. Nos ta spera cu den e di dos tanda mas informacion lo wordo hasi publico pa asina henter pueblo por ta informa di tur e casonan di corrupcion cu minister a topa cun’e. Ta masha particular cu ta hustamente e minister di husticia ta esun cu mas a pusha pa deshasi di minister Lopez-Tromp, bo lo pensa cu integridad ta un prioridad pa un minister di husticia. Na nos opinion ta na su luga pa entrega un mocion di desconfiansa berdad………. pero despues di tur loke a bin dilanti diabierna e pregunta ta …. contra cua minister?