PROF. Sam Cole Y DR. Victoria Razak

PA SIMPOSIO ‘RUTA PA TURISMO SOSTENIBEL’

Oranjestad – Movimento RAIZ tin e grato honor di anuncia cu profesor Sam Cole y doctor Victoria Razak, autornan di e rapport ‘How far, and how fast? Population, culture, and carrying capacity in Aruba’ (2009), na e di dos simposio organisa pa movimento RAIZ: ‘Ruta pa Turismo Sostenibel’.

Sam Cole ta Professor Emeritus na e Departmento di Planificacion Regional na Universidad di Buffalo NY. E tin un asociacion extenso cu Aruba: na 1981-1983 el a prepara un plan macro-economico pa e independencia di Aruba y e tabata consehero pa e negociacionnan Independence na Den Haag. Na 2004 Sam Cole y Victoria Razak a prepara e ‘Framework for Sustainable Tourism’ pa Aruba su Minister di Turismo. Prof. Cole y Dr. Razak ta bishita Aruba regularmente pa vacacion y investigacion. Sam Cole a prepara documentonan di polisa y modelonan di planificacion pa diferente agencianan internacional incluyendo e ‘Commission on Culture and Development’, e ‘UN Population Division’, UNITAR, e ‘UN  Development Decade’, y e ‘UNESCO Medium Term Plan’. Prof. Cole a consulta cu agencianan di desaroyo internacional y regional na varios pais na Africa, Asia y e Sur Pacifico, como tambe e continentenan di America. Sam Cole ta sigui investiga interaccionnan y structuranan global-local, maneho di caos, turismo, y cuestionnan di polisa publico na Aruba y den Caribe y na otro parti. E educacion di Sam Cole tabata den ‘theoretical physics’ na Imperial College, London, y Sussex University cu un ‘post-doctoral fellowship’ na Cavendish Laboratory Cambridge. Prof. Cole a join e ‘UK Department of Environment’ y e ‘Science Policy Research Unit’ na Sussex University prome cu el a bin traha na Aruba.

Dr.Victoria Razak a duna les den Antropologia Cultural na e ‘State University of New York’. E tin un BA den Arte y Diseño; su ‘Masters in the Humanities’, y un Masters degree den Antropologia General. Su investigacion Doctoral na Aruba a enfoca riba e politica y construccion di identidad, y e actuacion simbolico den e carnaval di Aruba. El a biba na Malaysia, Inglatera y Estados Unidos, y hunto cu Prof. Sam Cole nan a

mantene un hogar na Aruba pa 36 aña. Nan tabata tin e primicia ora ta trata di e isla su desaroyo turistico. Dr. Razak a duna les di ‘Qualitative Ethnographic Research Methods’ na e Universidad di Aruba y tabbata ‘Keynote Speaker’ na e ‘Federation of European Carnival Cities’ (FECC) presenta na Aruba (1997). El a sirbi como consehero na Biblioteca Nacional di Aruba pa e exhibicion “Forty Years of the Aruba Carnival”. Victoria Razak a wordo apunta como Editor pa e Journal of Futures Studies (1995) cu a publica su articulo “Culture under Construction”. Tambe el a publica un articulo den e Journal of Regional Policy (2008), “From Culture Areas to Ethnoscapes: An Application to Tourism Development”.  Alabes el a wordo invita pa ta orador na e facultad di e Universidad di Aruba “Carnival as a Celebration of Fertility and Community” (2004). El a publica e buki “Carnival in Aruba: History and Meaning in Aruba’s Bacchanal” (1997). Hunto cu Prof. Sam Cole, Dr. Razak a prepara ‘A Framework for Sustainable Tourism in Aruba’. El a traha riba e posibilidadnan pa desaroya producto y proyectonan turistico ful rond di e isla. Pa logra esaki a wordo dicidi cu tur Arubiano mester participa den e proceso, y un serie di gruponan di enfoke a wordo convoca na 8 region importante riba e isla. Di e forma aki diferente idea, opinion y propuesta a wordo genera y releha den e Framework.

E simposio ‘Ruta pa Turismo Sostenibel’ cu lo tuma luga dia 14 di juni 2019 na Cas di Cultura, di 7 p.m. pa 10 p.m., ta bay ta un oportunidad unico pa haya sa mas tocante Turismo Sostenibel na Aruba, pa conecta cu diferente pionero den area y interesadonan den e topico y asina wordo inspira pa yuda aporta na un turismo y un isla sostenibel y responsabel. Entrada lo ta solamente 25 florin.      

Pa haya sa mas tocante e simposio aki, por bishita RAIZ su pagina di Facebook, website of tuma contact via info@raizaruba.com of yama 630-3511