Misha Raymond (RAIZ): Acuerdo entre gobierno di Aruba y di Hulanda no por mina rol di Parlamento di Aruba
Dia 14 di juli Parlamento a tene un openbare bijeenkomst unda cu Minister-President y Minister di Finansa a bin pa un intercambio tocante un reaccion di Hulanda riba un amienda di Parlamento.
Minister-President a duna di conoce cu Staatssecretaris sra. Van Huffelen no a keda contento cu Parlamento di Aruba a entrega amienda pa cambia e ley di LNT. Y cu esaki tambe Hulanda no ta duna ‘aprobacion’ pa cuminsa paga e 5% di salarionan di empleadonan publico cu a wordo corta desde 2020.
E insinuacion tras di e condicion di Hulanda lo ta pa Parlamento di Aruba aproba un ley den e forma cu Hulanda kier, sin cu Parlamento di Aruba, den su rol di representa pueblo, haci su trabou como co-legislador di evalua y (si mester) adapta proposicionnan di ley. Pues e pensamento ta cu Parlamento di Aruba mester ta un stempel-parlement y simplemente aproba loke gobierno di Aruba y di Hulanda negocia.
Tin cu tene na cuenta cu e pago di salario di ambtenaar, incluyendo e 5%, no ta un asunto di reino, pero un asunto interno di pais Aruba, cu ta presupuesta y acorda pa Parlamento. E condicion di Hulanda por tin como consecuencia cu Hulanda no ta duna mas fiansa den forma di liquiditeitssteun, pero no un prohibicion pa cuminsa para e recorte riba salario di ambtenaar.
Nos no por crea un precedente cu for di Den Haag ta goberna Aruba. Imagina’bo si Parlamento di Aruba wordo ‘obliga’ di aproba un BTW pa tal dia, na tal porciento, manera Gobierno di Hulanda impone (landspakket). Como parlamentario mi tin e deber di evalua proposicionnan di ley a base di interes general di e pueblo di Aruba, presenta amienda si ta haya esey necesario, y vota zonder last manera nos Constitucion ta prescribi. Acuerdonan entre dos gobierno, y ideanan imponi door di otro pais, no por mina e rol di Parlamento di Aruba.
Manera expresa caba dia 24 di mei 2022: na momento cu nos ta hala principionan estatal un banda pa ehecuta condicionnan sin mas, nos ta atacha nos rol den Parlamento y cu esaki e democracia di nos pais.