Minister Arends ta duna reconocemento na Titi Tromp y Boy Escalona
Pa e clausura di e luna di Adulto Mayor, diabierna ultimo, Minister Ursell Arends a duna reconocemento na señora Estefana Gregoria (Titi) Tromp-Gil y señor Eleuterio (Boy) Escalona. Titi y Boy ta dos baluarte cu a contribui riba diferente tereno pa desaroyo di nos pais. P’esey tambe Titi y Boy ta dos persona hopi conoci den nos comunidad.
Ora tende e nomber di Titi Tromp ta recorda nos cultura y carnaval. Ora menciona Boy Escalona ta asocie cu pasadia pa nos Adulto Mayor cu demencia, Cas Marie. Sinembargo ora lesa biografia di Titi y Boy, ta conoce ambos baluarte mas mihor y por compronde tambe pa kico nan ta nos baluarte reconoci. Tanto Titi y Boy a contribui grandemente ariba diferente tereno na Aruba.
Titi ta forma parti di e grupo di Adulto Mayor di Centro di Bario Noord, “Grupo Uni”. Titi a yuda como boluntario den diferente clubnan social, cultural y deportivo, y ta hopi conoci den e pueblo di Noord pa ayudo pa muchanan, y tambe asistencia social. Tambe Titi ta un amante grandi di cultura di Aruba, y a yega di contribui na fiestanan cultural manera Dande, Dera Gai y tambe ta un fiel carnavalista. Titi a yuda Museo Historico Arubano colecta artefactonan di Aruba di antes, y ta gusta comparti su conocemento cu nos hoben nan den enseñansa.
Boy Escalona a traha 28 aña como docente den enseñansa na Aruba. Na aña 1979 Boy a funda MAO School, awe conoci como EPI Sector Economico. Boy a forma parti tambe di e comision cu a institui e Facultad Economico Financiero na Universidad di Aruba. Tambe Boy a forma parti di hunta di comisario di Setar y Aruba Investment Bank. Na aña 1994 Boy a experencia e malesa di Alhzeimer cerca su esposa. Esaki tabata su inspiracion pa e soño di Boy pa inicia cu e projecto pa personanan cu demencia. Na aña 2006, despues di hopi fe y preseverancia, Boy a logra realisa e projecto di Cas Marie. Cas Marie a bira e pasadia pa personanan cu demencia na Aruba, cual tambe ta yuda pueblo cu testnan pa memoria. Recientemente Cas Marie a cumpli 15 aña na luna di september.
Minister Arends ta contento di por a duna balor na esnan cu a sa di duna balor na nos comunidad. Ambos Titi y Boy, dos persona cu por sirbi como un ehempel pa otro cu nunca ta laat pa duna bek na bo comunidad, especialmente ora ta encera nos Adultonan Mayor.
