Nos sistema di salubridad publico ta den necesidad di un cambio structural urgente enfoca ariba resiliencia, sostenibiliad y inclusividad. E vision fundamental ta basa su mes ariba ‘prevencion ta miho cu cura’. Si nos inverti den medidanan preventivo awor, nos por alivia e peso medico y financiero den nos futuro.
E Reto Actual
Nos sistema di AZV ta formula di tal manera cu solamente un fase di nos cuido ta wordo atendi cune, esta e parti curativo. Un sistema ideal lo cuida di cada ciudadano di momento cu nan nace te na momento cu nan bai, esaki ta inlcui prevencion di malesa cronico manera obesidad of problema cu sucu como tambe cuido despues di un malesa manera cas di cuido pa Adulto Mayor cu problema cronico. E structura di AZV actual ta uno anticua cu no ta considera e retonan di e ultimo añanan aki lagando afo un gran cantidad di nos pueblo su necesidadnan. E ta asina stipula pa ley y mester mira un cambio pa por expande su funcionamento efectivamente.
Den e aspecto financiero nos por mira cu AZV awe ta conta cu surplus pero ta proyecta pa drenta un defecit rond di aña 2029 bou di e modelo actual. Esaki ta paso e mundo di medicina ta keda evoluciona na nivel global treciendo cune tratamentonan mas moderno pero tambe mas caro mientras cu nos sistema no a adapta. E sistema actual a recorta profundamente den pago di profesionalnan pa por keda ariba awa, bahando e sostenibilidad di nos sistema di salud publico.
E propuesta pa fortalece nos sistema di salud publico.
E ley di AZV mester wordo adapta pa efectivamente atende cu nos problemanan di salud di awendia. AZV mester cambia di un sistema exclusivamente curativo pa uno preventivo y cuido cronico sin laga atras ningun hende cu nan problema di salud. Asina AZV por hanja e tarea di actua a base di doelmatigheid.
Realoca fondonan pa asina nos por uza nos recursonan unda cu nan ta mas efectivo. E incentivo pa nos por atrae y retene mas trahadornan den cuido manera enfermera of doctor specialisa, specialmente yiu di tera, ta un factor principal cu lo yuda nos eleva e calidad di nos salud publico y hacie resiliente. E prome paso ta pa crea un resumen di nos costonan pa compronde precisamente na unda nos placa ta wordo uza, despues tin diferente manera pa dirigi e fondonan caminda cu di berdad nan ta necesario. Haci e cadena di cuido medico eficiente door di crea un sistema nacional integra caminda cu profesionalnan tin acceso rapido na tur informacion cu nan mester. Mas cu claro cu privacidad di pashent na prome luga. Esaki lo eleva e rapides di servicio mas lo yuda nos cu coleccion y analise di data y lo hiba nos na mas mehoracion di calidad ainda.
E meta ta pa transforma nos sector di salubridad na uno resiliente unda cu necesidad medico ta wordo atendi cune asta prome cu nan ta yega na existi. E direccion holistico aki, unda cu tur ciudadano ta inclui, lo sa di afronta e retonan mas grandi cu actualmente ta biba den nos pais. E momento pa ta proactivo ta awor, nos no por keda depende ariba un sistema anticua y spera cu nos problemanan lo wordo soluciona sin mas.
Ami ta Dr. Randall Leong, urologo y ex presidente di Asociacion di Specialista Hospital di Aruba (ASHA). Mi ta bin di un famia rubiano/chines di bario di Mabon y San Nicolas y mi ta casa cu 3 yiu. Mi ta gradeci mi expertisio cu ta brindami un bista profundo ariba kico tur ta pasa den nos mundo medico. Mi a dicidi di pone mi profecion temporalmente un banda pasobra mi sa cu tin un necesidad urgente pa cambia nos sistema di salud publico. Nos no por laga pa mañan locual cu nos por haci awe, y nos no por laga na otro locual cu nos por haci nos mes. A bira tempo pa bo salud bira prioridad di berdad.
Vota number tres ariba lista di Raiz pa un sistema di salud publico cu berdaderamente ta bai sirbi nos tur na tur momento di nos bida y bou cualkier situacion. Cu un bon salud publico nos tur ta gana.