Minister Mr. Geoffrey Wever: Desaroyo sostenibel y reduccion di desigualdad
Desde 2015 Aruba a adopta e Metanan di Desaroyo Sostenibel di Nacionnan Uni cu Agenda 2030 pa desaroyo sostenibel. E Agenda 2030 ta metanan mundial pa desaroyo sostenibel basa riba e principionan di Derechonan Humano y “Leave no one behind”.
E Metanan aki ta pa stimula desaroyo sostenibel. Ta crucial pa alcansa harmonia entre tres elemento esencial di desaroyo sostenibel: crecemento economico, inclusion social y proteccion di medio ambiente. E elementonan aki ta conecta cu otro y ta di suma importancia pa bienestar di individuonan y sociedadnan.
E Metanan di Desaroyo Sostenibel ta consisti di 17 metanan riba cual paisnan ta traha pa alcansa den nan contexto nacional. E metanan ta: 1. Caba cu pobresa; 2. Caba cu hamber; 3. Salud y bienestar; 4. Enseñansa di calidad: 5. Igualdad di genero; 6. Awa limpi; 7. Energia limpi y economico; 8. Trabou decente y crecemento economico; 9. Innovacion y infrastructura; 10. Reduci desigualdad; 11. Barionan y comunidadnan sostenibel; 12. Produccion y consumo responsabel; 13. Accion riba clima; 14. Bida bou awa; 15. Bida riba tera; 16. Paz, husticia y institucionnan formalisa; 17. Aliansa pa logra e metanan.
E cambio recente den e Codigo Civil di Aruba ta hasi union civil pa parehanan di e mesun sexo posibel. Riba diabierna 15 oktober 2021, e prome union civil di parehanan di e mesun sexo a wordo efectua na Aruba. Esaki ta di balor historico y un momento importante pa e logro di meta 10 Reduci desigualdad. Cada cuidadano mester tin oportunidadnan igual y wordo envolvi den aspectonan social, economico y politico di e sociedad.
Como Minister responsabel pa Desaroyo Sostenibel, cu implementacion di e Agenda 2030 di e Metanan di Desaroyo Sostenibel, mi ta mira e union civil aki como algo innovador y un paso inspirante pa un Aruba unda cada cuidadano ta igual.
Mr. G.B. Wever
Minister di Asuntonan Economico, Communicacion y Desaroyo Sostenibel
