Partido MEP a demostra cu pa MEP, interes di partido tin mas balor cu interes di Aruba. Kisas pa partidonan tradicional ta ‘normal’ cu ora nan goberna, nan tin cu dicidi ken ta Presidente di Parlamento y e Presidente ta yuda nan partido tin control riba Parlamento. E mesun Parlamento cu tin como tarea principal: controla Gobierno.
No ta por nada cu den nos sistema democratico, un Presidente di Parlamento mester eherce su funcion “onpartijdig en neutraal”. Obviamente, na Aruba esey tawata solamente teoria, mientras otro pais si a desaroya pa hasta por tin un miembro di oposicion como nan Presidente di Parlamento.
Aruba su ex-Presidente di Parlamento a maluza e autoridad cu su funcion a dun’e pa complace su partido. Por ehempel, ki ora ta yama cua reunion, cua reunion ta purba stel uit, cambio di procedura, y hasta purba cambia – riba mesun dia di trata un ley – con votonan ta wordo conta ora di abstencion, cu posibel consecuencia pa si un ley a wordo aproba of desaproba. Parlamentarionan di RAIZ a dicidi pa no vota pa re-eligi sr. Vrolijk. Mi kier remarca cu e puntonan di preocupacion di funcionamento di sr. Vrolijk como Presidente di Parlamento no ta personal, y no ta un atake riba su persona. Ta trata di un funcion crucial pa nos pais, y e puntonan menciona ta trata solamente su ehecucion di e funcion aki.
Ta un lastima cu un partido manera MEP, den aña 2024, tin e mesun cultura politico tradicional di decadanan pasa, tratando Parlamento di Aruba comosifuera ta Cede di MEP.
Considerando cu lo a palabra cu e Presidente di Parlamento lo ta un miembro di fraccion di MEP, y e vice-Presidente di fraccion di RAIZ, a propone na fraccion di MEP pa presenta un otro miembro di nan fraccion. MEP a nenga di haci esey y a insisti cu RAIZ mester vota pa ken nan kier como Presidente di Parlamento. Pero RAIZ no a bira participe na re-eligi un Presidente cu a demostra di no eherce e funcion na un forma imparcial. Fraccion di RAIZ a vota zonder last, manera nos Constitucion ta prescribi.
Loke a sigui ta cu e macinaria di MEP a activa, purbando di spin y frame loke a sosode. RAIZ lo ta inconfiabel, corupto, emocional y no sa di politica (sin menciona demas atake y insulto). Ta un lastima cu un partido manera MEP, den aña 2024, tin e mesun cultura politico tradicional di decadanan pasa, tratando Parlamento di Aruba comosifuera ta Cede di MEP. Parlamento di Aruba ta e organo representativo mas halto di nos pais, y nos sistema democratico nunca lo funciona manera mester ta, si Parlamento ta wordo dirigi na un forma partidista.
Cambio structural ta necesario. Cambionan manera transparencia activo y reforma di nos sistema democratico, percurando pa miho representacion, miho checks and balances, y mas influencia participativo di Pueblo.
Practicanan tradicional cu ta mina nos democracia pa decadanan caba, tin cu stop. MEP a demostra cu nan ta prefera baha Gobierno, na luga di goberna sin por call the shots den Parlamento. Cambio structural ta necesario. Cambionan manera transparencia activo y reforma di nos sistema democratico, percurando pa miho representacion, miho checks and balances, y mas influencia participativo di Pueblo. Pa realisa cambionan structural den con nos democracia ta funciona, no ta bay ta facil. Pero cu determinacion y consistencia, nos lo logra.