Ban Surpasa Pa Hunto Nos Reforma y Reconstrui Nos Pais
Den e tera di nos baranca Aruba tin un poder y energia cu ta parti di cada un di nos cu ta biba kinan. Ta e poder y energia aki a guia y inspira nos madushi y padushinan pa construi nos pais. Ta e mesun poder y energia aki a guia y inspira nos estadistanan pa exigi y adkiri Aruba su autonomia constitucional den reino Hulandes. Mi ta convenci cu ta e mesun poder y energia aki lo guia nos generacion pa surpasa e abismo social, financiero, economico y hasta constitucional cu ta afectando nos tur. Nos no tin otro opcion cu reforma y reconstrui nos pais.
Semper mi tawata tin e deseo di un dia contribui activamente na mi pais, pero desde cu mi a bira tata di un yiu muher, Sadie, awe 7 aña, y despues di un yiu homber, Isaac, awe 5 aña, e deseo ey a bira mas fuerte. Mi a realiza cu mi NO por keda para un banda, anto for di un posicion di comfortabilidad, observa e desaroyo di nos pais.
Un di e mihor momentonan di mi dia, a pesar di e rush di mainta, ta ora mi ta prepara desayuno pa mi dos yiunan, prepara nan pan, fruta y awa pa bai scol. Esaki ta un privilegio y un bendicion cu tur mayor y yiu merece di experencia. Lamentablemente, na nos Aruba di 2021, ainda tin muchanan ta bai scol cu bariga bashi. Realmente mi no por compronde cu tanto rikesa y desaroyo den nos pais, ainda tin tanto desigualdad.
Tempo mi a caba Colegio Arubano na 1999 mi a realiza cu esei tawata e momento pa mi a pone e fundeshi pa mi futuro den politica. Pesey mi a studia ley y a specializa den ley di impuesto, ya cu un politico mester compronde con su pais ta structura pa e por eherce su trabou corectamente. Mi a scoge abogacia como mi profesion y e ultimo 15 añanan mi a traha como abogado corporativo y fiscal cu hopi placer pa sector comercial. Mi a yuda mi clientenan realisa nan soño y prospera, pero awor a bira tempo pa mi dedica tur mi energia y locual mi a siña di sector priva, pa yuda nos tur aki na Aruba.
Di mi tata, conoci bou di su alumnonan como “meneer Chinto”, cu a dedica 40 aña di su bida na enseñansa, mi a hereda un interes den enseñansa. Pa yuda educa y comparti conocimiento, 7 aña pasa mi a cuminsa duna les na Universidad di Aruba. Prome na e Facultad Economico-Financiero y despues na e Facultad Huridico. Dunando les na Universidad di Aruba a siñami hopi, a confirma mi pensamento cu inversion den innovacion, enseñansa y nos docentenan ta indispensabel pa nos por educa y prepara nos lidernan di mañan.
Nos no tin tempo pa sinta delibera mientras cu tin miles di hende na cas sin trabou. Nos mester empuha nos economia, inmediatamente! Cu introduccion di incentivonan y cu un actitud pro activo di Gobierno, manera (i) flexibilisacion temporal di nos leynan laboral pa relacionnan di trabou nobo, (ii) eliminacion di red tape y (iii) reduccion di impuesto cu efecto directo pa inverti den innovacion y re-educacion di nos forsa laboral, rapidamente nos por crea cuponan di trabou pa nos hendenan.
Dentro di poco mi lo elabora riba e plan cu mi kier presenta pa jump start nos economia, esta e reconstruccion di Oranjestad den un capital moderno, consistiendo di vivienda pa nos young professionals y nos grandinan ariba di e negoshinan. Asina ta crea un balans entre recreacion, vivienda, comercio y diversion, como tambe un spin-off pa sector di construccion y e sector financiero. E plan aki ta incorpora vivienda pa nos young professionals y nos grandinan cu oportunidadnan pa inversion pa nos comerciantenan como tambe un atraccion turistico nobo!
Mi kier invita bo pa hunto cu mi y partido RAIZ, nos “Ban Surpasa”! Surpasa tur desigualdad na nos pais. Surpasa tur reto den enseñansa. Surpasa e crisis economico. Surpasa tur diferencia di opinion, hasta esunnan politico; Pa hunto nos reforma y reconstrui nos pais!
Mi ta convenci cu NOS POR!
Ami ta Geoffrey Wever, Mi ta desea di haya bo confiansa y bo voto 25 di juni proximo.