Autonomia pa “FIX” Cos Ta Yegando Na Su Fin
RAIZ ta hopi preocupa cu e ultimo desaroyo cu ta tumando lugar entre ministernan di Aruba. E forma con den conseho di minister e ministernan ta purba di kita e cartera di Minister Marisol Lopez-Tromp ta simptoma di e politica tradicional toxico cu nos tin na Aruba.
E hecho cu ministernan ta pensa cu nan por kita cartera di otro, sin pasa Parlamento y sin tene cuenta cu leynan vigente ta sosode ora politiconan na poder ta kere nan mes superior na regla y ley.
Aruba tin un historia di ministernan cu ta pensa cu regla y ley no ta conta pa nan.
Ta dificil comprende pakico no por acepta regulacion y control riba spearfishing, manera Minister Lopez-Tromp ta propone y pakiko ta contra di e posicion cu e minister a tuma pa loke ta trata e regulacion di acceso na parke di ATV’s y UTV’s. Unico motibo pa esaki ta cu trese regulacion ta na beneficio general, pero pa e clase politico e ta stroba nan di “fix” cos. E ta un problema serio ora cu ministernan ta pensa cu nan funcion ta pa “fix” cos, o sea e pensamento cu nan tin autoridad pa pasa rond di reglanan pa duna trato preferencial na otronan.
Tin hopi cosnan mas cu ministernan lo por “fix” pa amigonan, di cual varios ta cai den cartera di Minister Lopez-Tromp. Aunke ya tin un investigacion andando pa cu irregularidadnan den e cartera aki, ainda tin cos cu por “fix” pa gana voto. Nos ta pidi tur hende pa keda atento riba e privatizacion di DIP. E asunto di spearfishing y ATV den parke ta traduci den hopi voto, pero tur esey ta keda chikito compara cu asuntonan di infrastructura den cual ta trata cu propiedades cu ta bal biyones.
Regla y leynan ta conta pa tur hende, ningun minister por kere nan mes riba ley of cu e autoridad pa neglisha reglanan sin mas. E dianan ta conta pa e clase politico cu ta pensa solamente riba con nan ta “fix” cos pa gana voto. E era nobo ta na porta, e era di regla y regulacion caminda pueblo ta haña loke e tin derecho riba dje sin tin mester di roga pa un fabor politico.
Esaki ta e “autonomia” cu tanto e clase politico tin miedo di perde, e autonomia di por haci y deshaci libremente sin mester duna cuenta na ningun hende. Ta nada straño cu e clase politico ta esun cu mas ta protesta awo cu Hulanda kier pa e reglanan di wega wordo poni den un Rijkswet. Pasobra unabez den un Rijkswet, e politiconan ta perde nan “autonomia”.
Aunque e enfoke di politiek Oranjestad mester ta pa yega na un consensus cu politiek Den Haag cu ta na bienestar general di nos pueblo tin cierto minister ta mas interesa den probecha di purba “fix”cos mientras cu ainda por.