RAIZ den su perspectiva y vision pa Aruba ta pone enfasis riba ‘Dignidad Economico’ den cual e vision ta enfoca riba un economia basa riba bienestar humano y di oportunidad igual pa tur. Cu Dignidad Economico ta marca un fin na economia tradicional cu ta limita na e metrica tradicional di PIB (Producto Interno Bruto) y expande esaki pa inclui metrica pa midi e desaroyo humano.
A ser demostra cu persigui e economia tradicional cu ta mara e exito di un economia na indicadornan economico, no a hiba nos cuidadanonan cu ta e weso di lomba di nos Pais na e progreso y realisacion social, emocional, cultural, y economico.
E era unda cu economia a ser considera sobre potente riba nos bienestar general y basico no ta ser considera sostenibel mas den e mundo actual.
E meta economico di un Pais den harmonia mester ta dirigi na permiti hende biba un bida digno. RAIZ desde su inicio a bisa cu “welvaart y welzijn” mester bay hunto. Pa logra esaki den nos vision dignidad economico ta consisti di tres pilar social principal:
𝟭. 𝗖𝘂𝗶𝗱𝗮 𝗽𝗮 𝗳𝗮𝗺𝗶𝗮 𝘆 𝗱𝗶𝘀𝗳𝗿𝘂𝘁𝗮 𝗽𝗹𝗮𝘀𝗲𝗿 𝗱𝗶 𝗯𝗶𝗱𝗮:
Un perspectiva di un economia cu dignidad mester sigura cu e trahado/cuidadano por cuida pa su famia y gosa di e momento importante di bida, manera cria yiu, sin tin miedo pa inseguridad financiero y di e forma aki halsa e calidad di bida di su ciudadano. Cuido medico y remedi, educacion, recreacion deportivo, ta derechonan basico di tur hende, mientras seguridad mester wordo garantisa door di Gobierno, tempo liber y un salario digno mester ta parti di tur pakete laboral moderno.
𝟮. 𝗣𝗲𝗿𝘀𝗶𝗴𝘂𝗶 𝗽𝗼𝘁𝗲𝗻𝗰𝗶𝗮𝗹 𝘆 𝗽𝗿𝗼𝗽𝗼𝘀𝗶𝘁𝗼 𝗱𝗶 𝗯𝗶𝗱𝗮:
Tur hende mester tin e posibilidad pa persigi su potencial y haya sentido na bida, sin importa su situacion social of economico. Igualdad ta e base cu ta exigi cu mester por duna hende e oportunidad pa un “second or third chance” pa desaroya su mes, y sigi semper traha riba su educacion. Di ningun forma por sigui tolera bareranan manera discriminacion y pobresa cu ta stroba hende pa logra su potencial berdadero. Pa logra Dignidad Economico nos mester kibra tur e bareranan aki.
𝟯. 𝗣𝗮𝗿𝘁𝗶𝗰𝗶𝗽𝗮𝗰𝗶𝗼𝗻 𝘀𝗶𝗻 𝗱𝗼𝗺𝗶𝗻𝗮𝗰𝗶𝗼𝗻 𝗼𝗳 𝗵𝘂𝗺𝗶𝗹𝗶𝗮𝗰𝗶𝗼𝗻:
Hende mester por contribui na e economia sin ta someti na abusonan of wordo exploita. Esaki ta inclui proteccion contra practica laboral inhusto imponi riba e clase obrero of contra e derecho di por colectivamente negocia mihor condicionan. Abuso di consumidor por ehempel door di fluctuacion structural di prijs di comestibel of huur ta crea ansha y inseguridad. Pa logra igualdad y Dignidad Economico mester segura cu tur hende por traha y biba cu respet y e husticia cu nan merece.
Promove desaroyo economico di nos Pais no por ta un meta riba su mes. E meta ta e dignidad economico di nos hendenan atraves di e desaroyo economico den balansa cu nos naturalesa su bienestar. Priorisa bienester humano solamente por medio di numbernan economico abstracto, cu hopi bes ta irelevante den nos bida diario, lo no yuda yega e meta.
E perspectiva aki ta promove eqitabilidad den mercado laboral, reduci desigualdad, y sigura cu hende tin e recurso nesesario pa cuida y prove pa su famia, persigui su soñonan, y participa na e economia cu respet, dignidad y di un forma inclusivo.
Esaki ta un mensahe di Ursell Arends, lider di Plataforma Raiz
