Pa eleccion 2021 mi a campaña cu varios punto relaciona cu funcionamento di Aruba su democracia. Mi ta convenci cu ora nos democracia funciona debidamente, miho decisionnan ta wordo tuma, mientras interes general ta prevalece riba interesnan particular y di partido.
Desde 2021 mi a keda traha riba pasonan pa yega na un democracia nobo pa Aruba. Durante un conferencia di prensa di plataforma RAIZ mi a elabora riba algun desaroyo relaciona cu puntonan di campaña di 2021:
Publico.aw: e standard nobo den transparencia gubernamental
Publico.aw ta un proyecto pa percura pa Transparencia Activo den gobernacion, dunando Pueblo informacion gubernamental na un forma accesibel y innovativo. Por lesa mas informacion den e Nota Publico.aw.
Consulta Publico
Via e pagina di Consulta riba Publico.aw, Ministerio di Transporte, Integridad, Naturalesa y Asunto di Adulto Mayor lo consulta cu pueblo riba conceptonan di ley y di maneho. Di e forma aki, Gobierno ta duna pueblo e oportunidad pa haya conocemento di conceptonan legislativo y di maneho, y e posibilidad pa participa den loke lo bira e productonan final, stimulando transparencia y un democracia mas participativo.
Evaluacion pa introduci un Corte Constitucional pa Aruba
Desaroyonan recien ta confirma e motibonan pa evalua un Corte Constitucional pa Aruba. Actualmente, ora legislador (Parlamento+Gobierno) aproba y ratifica un ley, no tin otro instancia cu ta evalua si e ley ta cuadra cu nos Constitucion prome cu e drenta na vigor. Cu un Corte Constitucional, nos por fortifica e funcionamento di nos Constitucion, percurando pa leynan cu ta bay contra reglanan constitucional no drenta na vigor.