Den e ultimo lunanan, specialmente desde Gobierno a wordo desolvi, diferente declaracionnan fuerte y incorecto ta wordo duna riba e manehonan cu a bin ta hiba, asumiendo cu e situacion a bira pio of cu mester solucion structural. Tres di e puntonana den e declaracionnan aki ta resorta bou mi responsabilidad como minister.
E percepcion cu e asuntonan di desperdicio a bira “pio” ta preocupante pa mi, pasobra tin hopi prueba di progreso y mehoramento grandi. Durante e Debate Nacional ultimo por a mira atrobe declaracionnan eroneo entre otro cu solucion tabata existi di 20 aña pasa caba, declaracion di e mesun hende nan cu di e tempo ey tabata por a ehecuta e supuesto solucion den “tempo di bonanza” mane nan ta yama e temporada ey. Lamentablemente, eleccion tempran a privami di e oportunidad pa comparti cu tur hende e avanse y exito nan logra den e tres areanan aki.
Laga mi splica e situacion cu a bin ta haña, kico nos a haci, y kico ta e siguiente paso. E ta un plan di dies(10) paso, pero lo mi duna un version cortico. Laga nos cuminsa pa compronde con e situacion na Parkietenbos a sali fo’i man.
Tereno di desperdicio riba mangrovenan
Mas o menos 70 aña pasa, Gobierno di Aruba a haya un luga entre e e mondinan di mangel na Parkietenbos, un localidad cerca di Oranjestad, pero bastante leu pa e biento por yuda benta e huma di desperdicio cu ta kima pafo di e tera, pues den nos lama. Mi ta sospecha cu e desicion a bai den e direccion aki pa yuda evita molester pa e hendenan cu tabata biba den e barionan mas grandi. No tabata tin un preocupacion tocante e substancia carsinogenico cu e desperdicio tabata produci ora cu e tabata kima. Contaminacion di tera, aire y laman no tabata den consideracion e tempo ey.
Durante 70 aña, nos modelo di crecemento economico admirabel a transforma e area aki den un wasteland toxico. E mangelnan a wordo destrui y e Prikichi y e Loranan gradualmente a bandona Parkietenbos. Un sero di casi 30 meter di haltura a wordo forma cu desperdicio acumula, despues ta wordo bulldoze hunto cu tur sorto di desperdicio, kimico, azeta y sushi den tur forma. Y despues nan tabata cende esaki na candela regularmente sin ningun tipo di consideracion pa naturalesa of salud di hende. Nos ta yama esaki e “externalidad economico” di Aruba su model di progreso economico, ora progreso ta keda sigui na costo oculto pa e populacion y pa naturalesa.
Pa decadanan, tur esnan cu ta yega Aruba tabata haya un bon bini caluroso cu un nubia preto cubriendo e area, cubriendo nos isla. Nan prome impresion di nos isla no tabata uno berde di naturalesa of santo blanco. No, nan prome y ultimo impresion tabata un sero na candela cu un nubia preto mane carbon. Pero ya no mas. Dos aña despues cu ma sinta, e candela a desparece y e huma hunto cune. Esaki ta totalmente contrario di e idea cu “e situacion a bira pio.” Pensa un rato, kico di berdad tabata pio?
Y esaki ta solamente cuminsamento di e sanacion di area di dump na Parkietenbos. Pa 70 aña nos a contamina no solamente e tera y aire, pero e toxecidad den e tera ta drenta riba costanan di laman. E huma ta produci particulanan y kimico cu tambe ta cay den e awa di lama. E awa contamina ta bai pa e beach di Bucuti, pasa bay Renaissance Island Beach, Surfside Beach, pasa Pincho’s y ta drenta Rooi Manonchi na e beach di West Deck. Añadiendo na esaki, e muraya di huma toxico ta cera e espacio marino entre Oranjestad, Pos Chiquito, Savaneta, Cura Cabay y Baby Beach.
Cada bes cu biento a cay, e ciudadanonan den e area tabata sufri di e holo y e vapor stinki cu tabata sali for di e dump. Tin biaha e holo di dump tabata cubri henter e isla, incluyendo e airport caminda nos bishitantenan ta yega. Shen, si no ta 1000 hende mes a wordo exponi na e vapor di dump aki.
Pasonan cu a wordo tuma en corto:
1: No mas candela:
Na maart 2022, Aruba a establece su prime Ministerio de Naturalesa pa proteha nos miedo ambiente y adapta na cambio climatico. Den e mesun aña aki a cera dump Parkietenbos pa publico despues di 70 aña, abordando e riesgonan grave pa salud y medio ambiente.
2: Transformacion:
Unabes cera, a cuminsa transforma e dump den tereno cu por wordo uza. Eliminando un monton di sushi desorganisa pa asina por restructura e area. Trabounan ainda ta andando, pero ya caba a evita mas deterioro ambiental.
3: Muraya nobo:
Muraya nobo lo wordo construi pa defini claramente e limitenan di e propiedad y tambe percura pa cera acceso e area. Esaki ta un paso critico pa recupera e tereno bek pa naturalesa y futuro desaroyo.
4: Dump ilegal
E dumpnan ilegal a aumenta tras di e ceramento di dump parkietenbos. Ta importante pa pone esaki den perspectiva. Na 2012 segun e rapport di Cero Tolerancia a identifica 62 plot habri, cual 31 tabata wordo uza como dump ilegal, awe nan ta 6. DNM ta monitoreando nan y nos ta bin pa nan como siguiente paso hunto cu BCI.
5: Saneamento: Candela bou supericie y deshaci di asbesto
Aunke e candela riba tera a wordo paga, tin candelanan bou tera cu ta alimento pa material inflamabel. Ta usando ekiponan specialisa y tecnologia pa analisa via un mapa di calor pa localisa y atende cu e candela profundonan aki. Mesun cos ta conta pa asbesto, a activa un plan di emergencia pa aborda e peliger di asbesto. Expertonan internacional y local ta trahando pa garantisa e eliminacion corecto di e asbesto.
6: E bahada pa lama
Decadanan di tira sushi na canto di lama a pone cu awe tin un cero cu ta asina steil cu ta supera e standardnan di siguridad y ta representa un riesgo di “aardverschuiving”. Expertonan internacional a cuminsa e proceso di reprofila e bahadanan pa stabilisa e area y preveni un desaster ambiental.
7: Mangelnan di lama
E recuperacion di e mangelnan pariba y pabou di e dump ta wordo maneha door di ACF cu a tuma liderazgo ariba esaki. Mientrastanto investigacion ta tumando luga pa evalua e posibilidad di planta e matanan aki di nobo na e costa pa fortifica e barera entre e dump y e costa.
8: Panel solar
E tereno recupera lo ta disponibel den dos aña y lo converti esaki den un parke solar. E localidad at ideal pa motibo cu no ta apto mas pa habitacion humano y no tin interfencia di aviacion.
9: Prikichi y lora ta bolbe bek
Esfuersonan a tuma luga pa restora Parkietenbos pa condicionanan previo y asina por nota cu lora y prikichi a bolbe bek den e area. Estudionan ta den proceso pa crea un habitat cu ta apoya e specienan aki como parti di e recuperacion ecologico di e area.
10: Evaluacion di salud
Ta necesario pa haci un evaluacion di salud pa midi e impacto berdadero di e dump riba comunidad cerca. E gobernacion nobo lo mester pone prioridad pa colecta dato pa asina trata e inhusticia ambiental cu e habitantenan aki a sufri.
E luna di december aki, Aruba lo completa dos aña sin wordo cubri den huma preto den aire. Esaki tabata un prome paso importante pa sanea Parkietenbos. Pero cambio tin su efectonan colateral. Nos ta consciente di nan, y nos lo atende cu nan den secuencia: e situacion di dumpnan ilegal y sushi riba caya a wordo identifica, nos tin e dato necesario, y nos a ekipa nos mes pa atende nan un manera adecuado.
Por ultimo mi ta laga bos cu esaki: ora nos a scoge pa atende un asunto cu tabata existi pa decadanan, nos tabata sa cu lo tin resistencia. Cambio por trece miedo. Pero Aruba mester sa cu e daño cu nos a haci na Parkietenbos ta amplio y compleho. Nos a proyectanan y nos tin e caminda claro pa cana. Un caminda cu ningun otro a tribi di cana.
Pa awo, invitacion ta bai pa haci uzo di e oportunidad pa deposita bo desperdicio separa na ultimo Baki den Bario pa e aña aki dia 30 di november na Dakota di 7’or te cu 10’or di mainta. Tambe por “walk the talk” door di bira boluntario na e proyecto d agroforesteria unda ta trahando hardinnan di alimentacion pa hisa siguridad di cuminda y aporta na un economia mas circular.