Hopi por puntra nan mes kico exactamente ta politica nobo y kico e por nifica pa Aruba. E propuesta cu Plataforma Raiz ta bin ta implementa e ultimo añanan aki ta encera un cambio fundamental den gobernacion y participacion ciudadano. Den un era unda cu cada bes mas nos ta exihi transparencia y efectividad di nos gobierno, e manera nobo aki di hiba politica ta delinia un ruta cu un vision cla pa e futuro di nos pais.
Pues den e contexto di Aruba e politica nobo aki principalmente ta basa su mes ariba contenido y ta mantene cierto otro nocionnan di balor y normanan como guia.
Politica di Contenido:
Politica nobo mester wordo guia pa ideanan y plannan basa ariba evidencia solido, data obhetivo y analise profundo. Esaki semper mester ta e punto di partida di tur bo accionnan den politica y gobernacion. Implementacion di expertonan pa guia maneho, proyectonan y departamentonan ta esencial pa sigura efectividad den gobierno. Plataforma Raiz a haci e norma aki un di su pilarnan principal den e gobierno actual unda cu a institui e profesionalnan mihor califica den rolnan clave. Na ningun momento interesnan propio of politico por interferi cu politica di contenido. Asta durante campaña, bou di cual atakenan, insultonan y violencia nunca por forma parti.
Transparencia:
Politica nobo ta uno cu ta subraya e comunicacion abierto entre gobierno y pueblo. Politica y gobernacion mester por ta transparente cu updates regular ariba procesonan gubernamental, manehonan y proyectonan. Esaki ta crea confiansa y ta desminui e chens ariba corupcion. Durante e actual gobernacion, Raiz, a crea un plataforma unda cualkier ciudadano por mira kico tur ta pasando den cada ministerio. E iniciativa aki ta brinda acceso na rapportnan, manehonan y asta e uzo detaya di fondonan entre otro. Pues PUBLICO.AW a wordo crea pa hisa e nivel di transparencia den nos manera di goberna Aruba.
Participacion Ciudadano:
Politica nobo ta involucra e comunidad den procesonan gubernamental manera tumamento di decision. Por medio di consultanan publico, referendums y encuestanan ta mantene e cuidadano como un actor activo den diseño di maneho. Raiz a tuma e norma aki cu hopi seriedad den gobernacion organisando un cantidad di consulta publico y cu stakeholders pa tuma decision. Pa diferente iniciativanan, manera entre otro e Ley di Bienestar di Animal, Ley di Derecho di Naturalesa, Ley di Spearfishing y Ley di Corporate Governance a implementa participacion ciudadano.
Un manera di hiba politica cu pa nos isla no ta tradicional, enfocando su mes principalmente ariba contenido, ta e yabi pa un gobierno cu berdaderamente ta sirbi su pais. E transicion aki lo no pasa di un dia pa otro, e ta rekeri un cambio fundamental di mentalidad y un gran cantidad di disposicion.
Hunto nos por logr’e, hunto nos por haci di Aruba un pais unda cu gobierno ta rindi cuenta na su ciudadanonan y ta traha manera cu mester ta. Solamente asina nos por garantisa cu cada ciudadano ta biba un bida digno disfrutando di e prosperidad cu ta pertenece na nos tur.
E era di politica nobo ta awo y momento pa cambia e ruta di nos pais permamentemente a yega. Abo ta bai forma parti di esaki?