Parlamentario y lider di fraccion Raiz, Misha Raymond, a tuma nota cu atrobe tin algun politico y periodista ta purba di crea sensacion rond di su persona. E biaha aki ta pa su ausencia durante un reunion publico cu mester a tuma luga den Parlamento, pa trata e presupuesto di TPEF (Tourism Product Enhancement Fund).
Parlamentario Misha Raymond kier aclaria cu e no tawata na Colombia pa fiesta, ni tawata biahando pa interes propio, of algo similar. Tambe ta un hecho cu den e aña Parlamentario 2022-2023, Misha no a falta ni un reunion publico den Parlamento.
Tambe ta asina cu Misha a informa Presidente di Parlamento di su compromisonan y ki dia e lo ta ausente. Parlamentario Misha Raymond a keda pendiente pa wak si lo a cambia e fecha pa e reunion, mirando cu no lo a tin garantia di un mayoria, esta 11 Parlamentario presente pa sostene e reunion publico.
Misha ta un psicologo specialisa den cuido di mucha, y como un psicologo e mester sigui cumpli cu cierto rekisitonan pa e mantene su acreditacion. Te dia di awe Misha a logra pa sigui yuda muchanan cu mester di tratamento psicologico riba diasabra, banda di su trabou como Parlamentario. Un di e rekisito pa Misha por mantene su acreditacion ta cu e mester completa cursonan. Esey tawata e motibo pakico e no tawata presente na e reunion publico pa presupuesto di TPEF. Misha a comunica esaki di antemano cu Presidente di Parlamento. Ademas el a keda atento pa den caso cu ta necesario, e sali y presenta na e reunion, pero no a wordo pidi pa haci esaki.
Ta di lamenta cu cierto periodista, algun miembro di oposicion, y tambe Minister Dangui Oduber, a haci insinuacionnan cu ta yuda crea un percepcion eroneo, sin cu nan tin suficiente informacion. Ademas, obligacionnan pa mantene un acreditacion ta algo cu sigur un Minister di Salubridad lo compronde. Ta pa bon motibo ta permiti profesionalnan cu ta opta pa bira representante di pueblo mantene nan acreditacion, y Misha ta haci esaki na un forma responsabel. Ta hasta regla legalmente pa Ministernan den funcion, cu nan por cumpli cu rekisitonan pa mantene acreditacion, banda di eherce e funcion di Minister.
Tambe ta di lamenta cu aunke tawata tin suficiente Parlamentario presente pa un quorum (11 Parlamentario of mas), miembronan di oposicion a opta pa haci wega politico, y no drenta e sala pa permiti e reunion cuminsa.
