Ultimo lunanan e discussion pa loke ta trata ceramento di John Wesley College a wordo monitor di cerca door di Parlamentario Kamperveen di fraccion Raiz. Dia 8 di mei Kamperveen a vocifera riba rednan social e preocupacionnan entre mayornan y studiantenan cu a wordo treci na su atencion. Como Parlamentario, nos deber ta pa representa e pueblo, supervisa e accionnan di gobierno y garantisa transparencia.
Den cuadro di transparencia, dia 18 di april 2023 Kamperveen a dirigi un carta na Minister di Enseñansa y Deporte, sr. Endy Croes unda a haci diferente preguntanan pa haya claridad pa pueblo di Aruba riba e asunto lamentabel di John Wesley College.
Un di e reacionnan ricibi ta pa si por sigui busca mas informacion ariba e asunto mas di cerca for di esnan envolvi y tambe for di esnan cu ta wordo afecta.
A reuni y a comunica cu varios personana di contacto unda nan a bin ta splica cu e situacion di John Wesley College ya for di basta tempo tabata un preocupacion pa gerencia y trahadonan.
Den transcurso di reunionnan y buskeda di mas perspectiva ariba e caso, a ricibi contestacion di Minister di Enseñansa y Deporte. E mandatario ta informa cu gerencia y director di SPCOA a comunica cu John Wesley College su maestronan prome cu vakantie di pasco grandi 2023 y despues di vakantie cu e mayornan, unda tabata tin dialogo habri y honesto ariba e situaction di John Wesley College. Nan a bin ta enfrenta cu esaki durante e ultimo añanan caba y por bisa cu nan mester por a wak e decision di cera e scol lo bin. E mandatario a duna di compronde cu tur esnan envolvi ta compronde dicon mester cera John Wesley College. Tambe a splica cu e decision pa cera un scol mester wordo comproba door di un investigacion valido y confiabel, ora esaki a wordo haci a informa inspectie, e minister encarga cu enseñansa y director di Directie Onderwijs.
John Wesley College shete aña pasa tabata scol pa 227 studiante, e aña aki esaki ta solamente 62. Den e contestacion e mandatario ta menciona cu e gerencia di SPCOA actual no por papia pa e gerencia cu tabata dirigi prome cu nan, riba dicon of kico a wordo haci pa fortifica John Wesley College. Si por a bin di compronde cu un investigacion mester a wordo haci na 2021 pa saca afo ta dicon e scol ta ricibiendo menos studiante tur aña. Ta compronde cu e investigacion aki no a wordo conduci door di comunicacion no concreto entre docente y e director di e scol e tempo ey. Pero basa di datos di studiante per vak, ta yega na e conclusion cu no tin suficiente studiante pa forma un klas completo segun ley di enseñansa. Menos mucha/studiante ta conduci na mas ouderbijdrage cual ta hacie impagabel pa e mayor.
E ta un situacion lamentabel unda e pregunta e ora ta bira, ta dicon no tin suficiente studiante cu ta stroom door na e MAVO for di e basisschoolnan? Sin contesta riba e dicon, con ta bay yega na e solucion?
Educacion ta sirbi como pilar di progreso y prosperidad di cualkier pais, bo ta empodera un individuo, cultiva pensamento critico y ta habri caminda pa un futuro mas briyante.
Raymond Kamperveen
Un poblacion cu ta bon educa ta e yabi pa laga un pais yega su maximo potencial y logra desaroyo sostenibel den tur aspecto di bida. Perdida di un scol secundario tin efecto hopi grandi riba e nivel di educacion di un Pais y ariba e futuro di un sociedad en general, specialmente un Pais chikito mane Aruba.
Riba un nota mas positivo, Minister di Enseñansa a informa cu e docentenan nan interes ta protehi conforme ley, cual ta inclui nan salario y pensioen, y e proceso pa aloca docentenan tambe ta riba bon caminda cual ta dunanan seguransa di trabou. Pa loke ta trata e studiantenan, dia 5 di mei SPCOA a haya un bista di e escohencia di scol nan for di mayornan, unda e studiante lo por sigui su estudio. Esaki a wordo coordina riba un anochi informativo pa e mayornan unda directornan di otro scol tambe tabata presente pa provee mas informacion. Esaki ta sirbi como muestra di bon colaboracion entre e scolnan na San Nicolas y ta contento di tende esaki.
Pa conclui, e ceramento di John Wesley College ta keda uno no desea, como cu ta kita un MAVO for di e districto di San Nicolas. Parlamentario Kamperveen ta contento cu a ricibi contestacion riba su preguntanan y ta boga pa un investigacion mas profundo riba e cantidad di studiantenan cu ta stroom door for di nos basisschoolnan. Mester por capta e inconsistencianan den Aruba su educacion mas prome, unda basa riba proyeccion por percura pa un caso mane di John Wesley College no pasa mas.