Dierendag 2021 cu Minister Ursell Arends
Como minister encarga entre otro cu bienestar di animal, riba dia internacional di animal, minister Ursell Arends a haci bishita na varios fundacion y algun instancia di gobierno cu ta atende cu animal.
Durante formacion di gobierno a sinta cu 2 persona pa representa tur stakeholder pa locual ta trata cacho y pushi na Aruba, y a keda palabra cu una bes gobierno huramenta, lo sigui cu reunionnan asina pa yega na un bon colaboracion.
Siman pasa minister a reuni cu algun persona di instancianan di gobierno cu actualmente ta atende cu e Dog Population Management na Aruba. Entre nan Sandy cu ta na encargo di e Centro di Control di Cacho (CCC), Dean cu ta e polis na cabes di e Dog Control Unit (DCU), Kevin y Roy cu ta dirigi Bureau City Inspector (BCI), Waldrick y Marlon cu ta trahado di BCI y ta forma parti di e DCU di cual un di nan ta buitengewoon agent van politie, Arthur y Edgar cu ta lidera dos grupo di GKMB cu ta asisti e DCU, sin lubida Irene cu ta e veterinario cu a diseña e Plan Nacional pa atende cu e problematica di cacho.
Pa continua cu su compromiso pa yega na tur stakeholder, riba dierendag minister a habri su mainta cu un bishita na Baby Beach pa scucha di Turtugaruba kico tur ta e retonan cu nan ta encontra. Despues a bai wayaca pa conoce e facilidadnan di CCC y tambe Aruba Animal Shelter. A sigui cu un bishita na Santa Rosa, Philips Animal Garden, Nine Lives Aruba Foundation y Luna Foundation pa asina tur caminda scucha di e preocupacion y posibel solucionnan cu cada un di e personanan a presenta na minister y su team.
Merdia minister Arends, huntu cu minister Endy Croes y nos prome minister, a presencia e entregamento di premio na 30 mucha di scol basico cu a participa na e concurso di pintamento “stima bo cacho”. Representantenan di Post Aruba N.V. tambe tabata presente pa anuncia e 4 pinturanan ganador pa stampia 2022. E 4 temanan cu e muchanan mester a ilustra tabata: (1) baña bo cacho, (2) hunga cu bo cacho, (3) bo cacho como parti di bo famia, y (4) keiro cu bo cacho na leash.
Minister Arends ta contento cu ya caba ta di 3 aña cu e comision ta organisando e concurso di pintamento pa asina inculca e respet pa nos Ley di Cacho y e amor pa mascota serca nos muchanan, y lo desea continuidad den esaki tambe.
Ta masha impresionante pa mira con hopi hende y instancianan ta haciendo gran esfuerso pa mehora e calidad di bida di animalnan riba nos isla. E amor pa nos mascotanan ta grandi y e trabounan cu nan ta haci ta sali for di nan curason. Awor nan por conta riba un minister cu e compromiso pa sigi duna asistencia for di sector di gobierno pa sigura cu tur e trabounan aki por sigi conta cu maximo apoyo di gobierno. Minister kier a gradici tur persona cu ta dedica nan tempo y atencion na nos mascotanan y tambe na esnan cu na un forma of otro a aporta pa haci e dia aki uno fantastico. Alaves ta manda un cordial saludo pa tur mascota di Aruba y tambe pa nan hendenan.
