Perspectiva

SIRBIDOR

na bienestar di nos adultonan mayor

RAIZ a lucha y a logra cu Aruba porfin conoce un Ministerio pa Adultonan Mayor. Un ministerio dedica netamente na adultonan mayor por sigui stimula e balor, respet, cuido y proteccion di nos Adultonan Mayor. Nan participacion activo den sociedad ta central y nos meta ta pa nan por hiba un bida digno, sano, activo como tesoronan di nos comunidad. Fundeshi di esaki ta nos Delta Plan, nos Proyecto Pasadia, y inversionnan cu nos a prepara caba pa viviendanan adecuado y tur esaki hunto cu cambionan fundamental den maneho di belasting.

Perspectiva

LUCHADOR 

na bienestar y proteccion di nos muchanan

E lucha pa nos muchanan ta continua.  A organiza un plan extenso entro otro pa finalisa e Ley di Iniciativa pa inclui derechonan di mucha den nos constitucion, establece un Kinderrevalidatie / medisch kidnerdagverblijf, intervencion intensivo pa muchanan di 0-8 aña cu ta lanta den un bario di menos recurso pa kibra ciclo di pobresa, Minimumstraf pa pedofiel y elimina libertad condicional pa pedofielnan condena. 

Perspectiva

BOS

di Naturalesa, Medio Ambiente y Cambio Climatico

Progreso y naturalesa por bay hunto. Pa bienestar economico nunca ta necesario tanto destruccion di naturalesa y di nos beach nan. Construccion di mas hotel ta trece mas problema social y desigualdad entre nos hendenan. Ademas di sigui cu moratorium riba hotelnan nobo lo regula bendemento di casnan na stranheronan pa uzo comercial.  Tur cos ta cla pa por instala un entidad pa atende cu asuntonan di cambio climatico (‘KlimaatKamer’) y percura cu ley di planeacion teritorial (ROP/ROPV) ta dirigi na proteha y recobra areanan di Naturalesa. E maneho di desperdicio lo sigui wordo implementa den fase. Den proximo fase lo duna mas autoridad na esnan encarga cu control. Esaki ta wordo combina cu mas educacion riba necesidad pa tene nos isla limpi.

INNOVADOR

di un economia y finanzas cu dignidad

Nos pueblo a traha y a crea e  base pa un economia fuerte. Awo economia mester traha pa nos pueblo. Esaki ta e vision ‘Dignidad Economico’, den cual ta enfoca riba un economia basa riba bienestar humano. Cu dignidad Economico ta marca un final di economia tradicional cu ta condiciona na e metrica tradicional di PIB (Producto Interno Bruto) Alabes lo introduci un VAT (na un tarief fiho), fortalece entrada di belasting y cumplimento incorporando tecnologianan nobo (avansa) y formacion di capacidad.

FORSA

di Integridad, Democracia y Husticia

Pa bringa corrupcion den tur sentido y crea un sistema cu por garantisa democracia real y confiabel cu e Programa amplio y concreto ‘Change the system’ cu ta insera entre otro alocacion di asiento (restzetels), votacion separa pa parlamento y gobierno, ministerionan mas efectivo y eficiente, consulta publico structural, propaganda y financiamiento politico, derecho di voto pa studiante den exterior y Corte Constitucional.

REALISADOR

di un salubridad y cuido sostenibel

Nos ta enfoca riba prevencion pa un Aruba saludabel y un sistema innovativo cu ta resiliente y sostenibel den amplio sentido. Pa logra esaki tin un plan di accion

• atendiendo debidamente cu prevencion di malesanan cronico
• crea e structura di financiamento responsabel y cu ta ofrece cuido adecua
• digitalisacion nacional cu un sistema di epidemiologia fuerte di Aruba
• como tambe enfoca riba durabilidad y principionan circular.

Perspectiva

DEFENSOR

cu pasion pa educacion

Cu ta accesibel, inclusivo, innovativo pa empodera nos muchanan, nos docentenan pa medio di un reforma di ley anticua di educacion, Bus di Educacion, Plataforma Nacional di Educacion cu ta inclui alumno y mayornan, educacion na midi (zorgklassen), Docente Felis, un infrastructura di scolnan amplio y  un curiculo dirigi na formacion na luga di habilidad intelectual.

AMIGO FIEL

na bienestar di animal

Nos mascotanan na cas y animalnan liber den naturalesa tambe tin derecho. Hopi ta reconoce esey, pero den nos comunidad ainda tin abuso di animal. Nos meta ta un comunidad cu ta cuida y proteha nos animalnan domestico cu responsabilidad y cariño. Pa esaki a prepara y ta implementando caba nos Plan di Maneho Bienestar di Animal, nos Ley di Bienestar di Animal y algun otro medida. Tur esaki cu un relacion fortifica cu NGO’s y otro partners di  comunidad cu ta comparti e metanan aki.

EMPODERADOR

di un sistema social husto y fuerte

Aruba ta conoci pa su hendenan solidario y curason grandi, semper dispuesto pa yuda esnan den dificultad of cu menos capacidad. Prosperidad mester trece bienestar pa nos tur y bienestar general mester ta e proposito di tanto trabou. Tur hende mester tin e oportunidad di contribui y beneficia di un sociedad mas solidario y den harmonia. Programanan intensivo pa kibra cu traumanan, incluyendo ayudo psicologico den e pakete basico di azv, revision y adaptacion di Ley di Bijstand y di servicionan social existente den cual ta adapta y amplia cu servicionan y profesionalnan adecua y bon ekipquipa, fortifica e cadena di servicio (Zorgketen), logra un reduccion di 50% di e total di personan riba bijstand door di ehecutando programa intensivo di empoderacion y realisacion propio, fortificando lasonan den Bario cu “Embahador di Bario!”.

PROMOTOR

di cultura y deporte

Nos pais tin suficiente recurso pa por reforsza nos identidad cultural y amplia e industria y sector creativo. RAIZ tin un plan extenso pa logra esaki.  Igualmente por haci pa deporte cual mester wordo considera un derecho basico di nos muchanan y hobennan. Ta bon conoci cu mester haci cambionan drastico den e sistema di subisidio di deporte. Exito di e trayecto aki ta ora cu na Aruba nos ta garantisa cu niun cuidadano ta ser exclui y tur deporte tin e oportunidad igual na subisidio y promocion.

CULTIVADOR

di sector primario

Aruba tin suficiente recurso y capacidad pa fortalece su sector primario. Santa Rosa ta un entidad fuerte y bon organisa. Cu mas recurso y autoridad den man, nan capacidad y expertisio por garantisa un sector robusto pa ehecuta ley pa Agricultura, Cria y Pesca. Falta cierto cambio den Leynan di regulacion di spearfishing, realocacion di terenonan pa logra yega na e meta na unda den tur hogar na Aruba facilmente por tin por lo menos un mata di fruta. Siguridad di alimentacion real ta crucial pa un isla chikito y asina tambe ta baha e dependencia riba productonan di pafo.

TRANSFORMADOR

di e sector di Turismo y sociedad sostenibel

Nos por regenera nos mes y bira un sociedad den cual turismo, naturalesa y nos comunidad tur por progresa hunto. Compara cu tur otro retonan ta relativamente facil pa re-organisa na un forma permanente y structural e reparticion di entrada di turismo. Fondonan aki ta publico y mester wordo inverti den bienestar humano, educacion, transporte, naturalesa, medio ambiente y cambio climatico. Transicion pa energia renobabel a cuminsa, pero mester wordo enfatisa mas ainda. Nos plan pa explora hidroficacion di produccion di energia mester un impulso nobo y incentivo fiscal pa comercio y cas pa mehora eficiencia di energia. E modelo anticua di Utilities, WEB y Elmar mester pasa pa pasado y di forma cu Aruba por conoce un sistema decentralisa di generacion di energia (renobabel). Idealmente lo haci esaki den diferente districto y region (‘Energia den Bario’).

Perspectiva

PROTECTOR

di nos autonomia den Reino

Cooperacion y respet mutuo lo ta e base di relacion den Reino! Esaki no ta bay cambia. Pero pa ambos banda di oceano comprende otro bon, ta necesario pone riba papel kico realmente nos por spera di otro y con nos lo atende cu otro. Pa esaki tin un comision fiho cu formalmente lo wordo instala como “Commissie Uitvoeringsagenda, Coordinatie en Relatie Nederland”. Ta nan tarea pa guia y coordina relacionnan, cooperacion den reino y e implementacion di e Landspakket.

RAIZ a cambia politica y a demostra cu hunto nos ta defini e destino di nos Pais. Nos ta cosechando e fruta di simianan planta unda Politica na Aruba ta evolucionando den direccion di RAIZ su vision pa enfoca riba contenido.

Keda pendiente pa e plan completo, traha door di e profesionalnan di RAIZ. Un plan concreto cu a pasa door di expertonan y basa riba datos cu ta garantisa ehecucion exitoso. Aruba merece un plan structura pa un destino sostenibel.