Hidrogeno Limpi – Colaboracion entre tres grupo pa crea un pilar economico nobo
Actualmente Aruba ta pasando den momentonan di incertidumbre. E crisis cu nos ta bibando lo tin efecto negativo pa tempo indefini. Pa e motibo aki ta importante pa Aruba sondea riba otro posibilidad pa crea un pilar economico nobo, uno cu por brinda nos mas stabilidad memey di crisis, door di crea mas cupo di trabou pa nos hendenan, genera mas entrada y cu no ta dañino pa nos medio ambiente.
E gobierno actual tambe ta keda busca posibilidad riba procesamento di crudo y posibel exploracion pa gas cu e intencion pa mehora nos economia, mescos cu e gobierno anterior. Ta conoci si caba cu tin e posibilidad cu tin gas den teritorio di Aruba. Pero si logra haya mes, e no lo bira di pais Aruba, pasobra gran parti di e placa lo bay afo, como cu nos no tin e fondo pa haci un inversion di e magnitud ey, ni e infrastructura adecua pa e proceso, ni e conocemento con pa haci e proceso aki. Si nos tabatin e fondo y e conocemento, e refineria lo ta operando caba, cual lo a representa un segundo pilar economico cu lo por a minimalisa e impacto di e crisis cu Aruba ta aden. Pero esaki no ta e caso.
Un otro opcion cu RAIZ a presenta den un previo articulo riba e mesun topico, “Un pilar economico limpi y duradero”, ta e produccion di hidrogeno limpi, cu ta un miho alternativa pa Aruba y principalmente pa nos medio ambiente, mirando e dañonan cu gas y azeta crudo ta haci na nos sistema ecologico.
Aplicando e proceso electrolisis, un proceso caminda ta combina awa cu coriente, por produci hidrogeno. Hidrogeno ta un gas cu bo por warda pa uza despues y e ta reemplasa importacion y producto di azeta crudo. Si produci hidrogeno uzando energia renobabel (limpi), por papia di hidrogeno limpi, cual ta loke nos di RAIZ ta interesa den dje.
Triple Helix: Harmonia y colaboracion entre tres grupo:
Pa por logra un economia nobo mester di e tres gruponan: gobierno, universidad y sector priva. Entre nan mester tin harmonia y colaboracion pa asina hunto por realisa un pilar economico nobo. Si un di nan no ta alinea den e mesun rumbo, e proceso lo no ta exitoso.
Na Aruba nos por wak un ehempel di esaki den turismo. Mira con turismo ta funcionando uzando e triple helix: gobierno tin su rol akiden pa tin e vision, e sector priva na su turno ta ofrece servicio na e turista y nos universidad y nos scolnan ta educa nos hendenan pa por drenta e tereno laboral.
EPI Sector Tecnico & SISSTEM:
Enseñansa ta un parti esential ora cu ta papia di economia. Mester educa nos hendenan pa nan por drenta e mercado laboral. Esaki nos por wak ta tuma luga pa hopi aña caba den e sector turistico. Nos ta domina diferente idioma, cu ta duna nos bentaha, y nos tin un universidad cu ta conecta cu e cuponan di trabou necesario.
Precisamente esaki nos kier logra cu hidrogeno. Unda cu sostenibilidad ta hunga un rol importante pa e desaroyo di nos hendenan riba diferente nivel, manera economico, social y ambiental. Kinan ta unda EPI Sector Tecnico y SISSTEM (Sustainable Island Solutions through Science, Technology, Engineering & Mathematics) lo por produci persona cu e tipo di cualidad cu ta necesario pa drenta entre otro e industria di hidrogeno. Tambe, esnan cu a studia afo lo por regresa nan tera bek, caminda lo tin oportunidad di trabou garantisa pa nan tambe.
Industria y sector priva:
Unabes Aruba produci su propio fuel limpi basa riba hidrogeno, lo stimula diferente negoshi pa uza e producto di hidrogeno den combinacion cu otro producto of sistema. Esaki no lo stimula negoshi local so, pero tambe internacional. E termino ta conoci como spin offs, unda cu rond di e producto hidrogeno, mas negoshi ta bin duna asistencia na e desaroyo di hidrogeno of ta sigui desaroya un otro producto uzando hidrogeno. Un ehempel ta, cu hidrogeno den combinacion cu carbon dioxide, cu ta resto di gas responsabel pa polucion, por traha fuel pa avion y barco, manera e kerosine sintetico, cu ya caba por wak KLM uza parcialmente den un buelo di Amsterdam pa Barcelona dialuna 8 di februari. Aki nos ta papia di un economia circular, caminda cu loke normalmente ta susha nos medio ambiente, ta transforma den un producto di necesidad pa mercado local y tambe internacional.
Aruba ta un pais cu ta haya bishita di barco y avion practicamente tur dia, y como cu nos tin e infrastructura caba pa ricibi barco y avion, ta haci cu e medionan di transporte aki por tank na Aruba mes, ora nan bin pa importa producto of pa turismo. Kinan por mira con nos impactonan negativo ta transforma y bira uno positivo no solamente pa economia, pero tambe pa medio ambiente y nos propio hendenan.
Gobierno:
Gobierno tin cu brinda stabilidad na e inversionistanan di sector priva cu lo inverti den e proyectonan relaciona cu hidrogeno. Pa mustra e seriedad di e pilar economico nobo aki, gobierno tin cu haci e prome stap door di crea e planta piloto di hidrogeno pa demostra e potencial di esaki. Alabes, gobierno mester sinta cu tur gremio relevante pa haya nan tambe abordo y asina crea un situacion caminda tur envolvi ta sali beneficioso.
Ademas, gobierno tin cu percura pa enseñansa por ofrece e curiculo apropia pa por prepara hende adecua pa carga e desaroyo economico nobo aki.
Ta responsabilidad di gobierno pa crea un fundeshi solido pa e economia nobo, cu lo mester ta basa riba siguransa y seriedad di nan parti. P’esey henter e proceso mester pasa den un cuadro di transparencia entre e tres gruponan di e triple helix cu iniciativa di gobierno.
Un pilar economico, manera esun di hidrogeno, ta consisti di diferente factor tangibel y intangibel. Den e articulo anterior tur e factornan tangibel ta menciona y mayoria di esakinan ta disponibel. Sinembargo, factornan intangibel, manera conocemento, ainda tin cu inverti tempo pa realisa nan na un grado cu lo por carga e pilar economico nobo.
Pues un pilar economico no ta solamente importa un tecnologia y instal’e, pero mas un colaboracion entre diferente grupo relevante den nos pais cu mester contribui y cumpli cu nan responsabilidad pa cristalisa e meta aki pa nos pais.
Nos di RAIZ si ta kere cu esaki ta posibel. E vision pa un industria di hidrogeno ta un vision pa awo y pa futuro. Un vision cu no tin beneficio solamente pa e generacionnan actual, pero tambe pa e siguiente generacionnan. Un industria limpi, teniendo na cuenta e salud di nos ciudadanonan y e responsabilidad cu nos tur tin pa nos medio ambiente. E tin un potencial economico grandi, diversificando nos economia, creando cupo di trabou directo y indirecto, y asina percurando pa mas oportunidad economico pa nos hendenan. Trahando hunto — gobierno, EPI, Universidad, sector priva — nos por realisa un desaroyo real, coherente y sostenibel pa nos pais.