RAIZ ta Introduci Financiamento di Campaña cu Donacion Chikito
Pa pone un fin na e sistema tradicional di politica y trece confiansa bek den nos Parlamento, RAIZ ta distancia su mes di e tradicion vulnerable di financia campaña politico cu ta permiti “pay to play”, paga pa participa. Contrario na partidonan tradicional, RAIZ no ta bende influencia na ningun sponsor y ta para pa igualdad den representacion.
Nos plataforma ta aprecia cada florin cu nos ricibi, pero donacionnan ta limita na un maximo di Afl. 1200,- pa aña pa persona y/of empresa.
Nos Vision:
Desde cu Plataforma RAIZ a ser funda, un di e puntonan den nos statuut cu ta haci nos diferente na tur otro partido politico, ta e forma con nos por recauda fondo por medio di Crowdfunding. Esaki ta ancra den nos statuut den articulo 4.
E forma tradicional di financia campaña politico riba nos isla no ta aceptabel mas den e era cu nos ta bibando aden. Fuera cu e sistema aki ta duna influencia desproporcional na sponsornan di e partidonan tradicional, e ta crea alabes inigualdad politico cu tur su desbentahanan pa nos pueblo. Financiamento di partido politico ta bira un problema ora cu e placa pa campaña ta bin aplastantemente di un grupo chikito di sponsornan y ta influencia maneho di nos pais di tal manera cu ya esaki no ta sirbi e interes general di e pueblo.
Cu e sistema cu RAIZ ta propone, influencia politico di pueblo ta wordo democratisa. Generando fondo exclusivamente cu donacionnan relativamente chikito ta kita e influencia desproporcional di sponsornan individual riba politica y gobernacion.
Meta di RAIZ ta pa sigui duna contenido na nos plataforma pa asina nos ta prepara pa proximo eleccion. Aunke cu eleccion ta dia 24 di september 2021, nos mester ta prepara for di awor caba.
Danki na cada un di boso pa e sosten. Hunto nos lo move nos pais den un mihor direccion. Nos y nos futuro generacionnan merece un miho Aruba.
Nos Aruba Nobo, Hunto Nos ta Logr’e.